«Գազպրոմ Արմենիա» ՓԲԸ «Ուսումնա-սպորտային համալիրի» շրջանավարտներն իրենց ուսումն են շարունակում Հայաստանի և աշխարհի լավագույն բարձրագույն կրթական հաստատություններում։

Մենք պատմում ենք մեր շրջանավարտների մասին՝ նրանց օրինակով ոգևորելով ԳԱՈՒՍ-ի աշակերտներին։

Շարքի հերթական զրուցակիցն է 2022-2023 ուսումնական տարվա շրջանավարտ Անի Վարդևանյանը, ով ուսումը շարունակում է Հայաստանի գեղարվեստի պետական ակադեմիայում՝ դիզայնի և դեկորատիվ-կիրառական արվեստի ֆակուլտետի համակարգչային գրաֆիկայի բաժնում։

-Անի, ինչո՞ւ եք ընտրել այս բուհը և այդ մասնագիտությունը։

- Ես միշտ սիրել եմ ստեղծագործել և շատ հետաքրքրություններ ունեմ։ Որոշեցի այնպիսի մասնագիտություն ընտրել, որը ինձ հաճույք կպատճառի և չի ձանձրացնի։ Ընտրությունս կանգ առավ ՀԳՊԱ-ի վրա, քանի որ այն բավականին հայտնի է իր հաջողած շրջանավարտներով։

-Որո՞նք են եղել դպրոցում Ձեր ամենավառ հիշողությունները։

- Վառ հիշողություններ շատ են եղել, դժվար է բոլորը հիշելը։ Կարող մի քանիսն ասել, օրինակ շատ էի տպավորվել, երբ 10-րդ դասարանում այցելել էինք Գյումրի։ Անչափ հետաքրքիր էին անցնում «Քիմիայի» դասերի փորձերը։ Շատ լավ հիշում եմ ապրիլի 1-ի մեր կատակը, երբ թաքնվել էինք դասղեկից։

- Որո՞նք են եղել դպրոցում Ձեր ամենասիրելի առարկաները։

- Իմ սիրելի առարկաները հիմնականում կապված են եղել ուսուցիչների հետ։ Հեշտ է սիրել այն առարկան, որը լավ են մատուցում և ճիշտ վերաբերմունք են դրսևորում։ Այդպիսի առարկաներ են եղել բոլորը, հատկապես կառանձնացնեմ «Գրականությունը», «Ռուս գրականությունը» և «Հայոց պատմությունը»։

- Բացի դասերից, էլ ինչո՞վ եք զբաղվել դպրոցում՝ խմբակներ, միջոցառումներ ․․․

- Մեր դպրոցի առանձնահատկություններից էր այն, որ բացի դասերից մենք ունեինք նոր բաներ սովորելու լայն հնարավորություններ։ Մեզ տրված էր ընտրել 20-ից ավելի խմբակներ։ Ես, օրինակ, հաճախել եմ գեղասահքի, կավագործության և երգի խմբակներ։ Դրանց շնորհիվ բացի հանրակրթական գիտելիքներից, ունեմ նաև այլ հմտություններ։ Սովորելու տարիների մասնակցել եմ նաև շատ միջոցառումների, օրինակ՝ 2020-2021 թթ. բարեգործական ցուցահանդես վաճառքին, 2021 թ. Մայիսյան հաղթական եռատոնի, 2021 թ. Բաբաջանյան 100 և այլ միջոցառումների։

- Բացի կրթությունից, էլ ի՞նչ է տվել Ձեզ դպրոցը։

- Կարող եմ ասել, որ ձեռք եմ բերել ընկերներ, որոնց հետ մինչ այսօր կապ ունեմ։ Բացի հիանալի կրթությունից, դպրոցն ինձ տվել է կարծիք ունենալու, այն արտահայտելու և պաշտպանելու ունակություն՝ շնորհիվ ընկեր Նժդեհի՝ «Հայոց պատմություն» առարկայի ուսուցչի, ներելու և հասկանալու ունակություն՝ շնորհիվ ընկեր Գալստյանի՝ «Գրականություն» առարկայի ուսուցչի։

- Արդեն որպես շրջանավարտ, ինչպե՞ս կգնահատեք ԳԱՈՒՍ–ում կրթության որակը։

- Համեմատած այլ դպրոցների հետ միանշանակ կարող եմ ասել, որ շատ լավ կրթություն եմ ստացել հենց ԳԱՈՒՍ-ում  և անչափ շնորհակալ եմ դրա համար։

- Ըստ Ձեզ, ի՞նչ նշանակություն ունի կրթությունը։

- Կրթությունը կյանքի ամենակարևոր բարիքներից է։ Այն ձևավորում է մտածողությունը, տալիս է գիտելիքներ ու հմտություններ, տալիս է հնարավորություններ, բացում է դռներ և օգնում է հասնել հաջողության։ Այն նաև խթանում է հասարակության զարգացումը և օգնում է բարելավել կյանքի որակը։

-  Որտե՞ղ եք պատկերացնում Ձեզ հինգ տարի անց։

- Երբեք չեմ կարողացել պատասխանել այն հարցին, թէ որտեղ եմ պատկերացնում ինձ հինգ տարի անց, քանի որ իմ կյանքը և որոշումները շատ պատահական են։ Սակայն մի բան հստակ է․ կշարունակեմ սովորել, ուսումնասիրել, լինել ավելին, քան կամ այսօր։