«Լեզուն է ամեն մի ժողովրդի ազգային գոյության և էության ամենախոշոր փաստը, ինքնուրույնության ու հանճարի ամենախոշոր դրոշմը, պատմության ու հեռավոր անցյալի կախարդական բանալին, հոգեկան կարողությունների ամենաճոխ գանձարանը, հոգին ու հոգեբանությունը»․ Թումանյանական այս տողերն ավելի են նշանավորվում, երբ նշում ենք Մայրենի լեզվի օրը:

Տոնի կապակցությամբ «Գազպրոմ Արմենիա» ՓԲԸ «Ուսումնա-սպորտային համալիր»-ի 10-րդ դասարանի սովորողները ուսուցիչ Լիլիթ Գրիգորյանի և դասղեկ Սմբատ Խալաթյանի հետ «Հայոց լեզու» առարկայի շրջանակում մասնակցել են Մատենադարանի «Ձեռագրերի երկրորդ կյանք» կրթամշակութային ծրագրին։

Լ․ Գրիգորյանը նշել է, որ «Ձեռագրերի երկրորդ կյանք» ինտերակտիվ կրթամշակութային ծրագրին մասնակցելու նպատակն էր արժևորել մայրենի լեզվի դերն ու նշանակությունը,– «Այցի նպատակներ էր օգնել աշակերտներին գիտակցել, որ ժողովուրդները գոյատևում են ոչ միայն իրենց հողով, այլև իրենց լեզվով, երբեմն ավելի իրենց լեզվով, քան նույնիսկ հողով: Մեր լեզուն վեմ է, առանց որի մեր ազգը չի օրհնվում, մեր եկեղեցին չի օծվում, մեր մանուկը չի սնվում, ու թե թեքվեց այդ վեմը, ուրեմն մի կարևոր բան սխալ է մեր գոյության ընթացքում: Եթե չուղղենք այդ սխալը, կկորցնենք մեր ազգային նկարագիրը, մեր ինքնությունը»:

Այցի ընթացքում սովորողները ծանոթացել են հին ժամանակներում որտեղ և ինչ պայմաններում են պահվել ձեռագրերը, ինչպես են վերականգնվում վնասված ձեռագրերը Մատենադարանում, վերականգնման համար նախատեսված ինչպիսի ժամանակակից գործիքներ և նյութեր գոյություն ունեն։

Ստացած գիտելիքի շնորհիվ աշակերտները դարձել են վերականգնողներ և վերականգնել են ձեռագրերի վնասված թերթեր։ Վերջում սովորողները թեմատիկ շրջայց են կատարել Մատենադարանում։