«Գազպրոմ Արմենիա» ՓԲԸ «Ուսումնա-սպորտային համալիր» հիմնարկում 6-րդ «ա», «դ» և «ե» դասարանների մասնակցությամբ տեղի է ունեցել Սլավոնական գրերի օրվան նվիրված «Բացենք բառարանը միասին» խորագրով միջոցառում։

Միջոցառման սկզբում աշակերտները հանդես են եկել շնորհանդեսներով՝ ներկայացնելով բառարանների տեսակները, դրանց դերն ու նշանակությունը լեզվի պահպանման և զարգացման գործում։ Նրանք անդրադարձել են նաև ռուս հայտնի բառարանագիրներ Վլադիմիր Դալի և Սերգեյ Օժեգովի գործունեությանը, ինչպես նաև ներկայացրել ժամանակակից առցանց հարթակները, որոնք օգնում են գտնել անհրաժեշտ տեղեկատվություն։

Այնուհետև թիմերը մրցել են երեք փուլից բաղկացած խաղում, որի ընթացքում աշխատել են տարբեր տեսակի բառարանների հետ և կատարել առաջադրանքներ։ Թիմերին ակտիվորեն աջակցել են նաև երկրպագուները, որոնք մասնակցել են առանձին առաջադրանքների կատարմանը և իրենց թիմերին ապահովել լրացուցիչ միավորներով։

Ըստ միջոցառման կազմակերպիչ, ռուսաց լեզվի ամբիոնի վարիչ Թամարա Առուշանովայի՝ բառարանները նպաստում են բառապաշարի հարստացմանը, լեզվի առավել խորքային ընկալմանը և գրագետ խոսքի ձևավորմանը։ Միջոցառման նպատակն էր նաև նպաստել լեզվական ինտուիցիայի զարգացմանը և թիմային աշխատանքի ամրապնդմանը։

Միջոցառման ավարտին հաղթող թիմը՝ 6-րդ «դ» դասարանը, ինչպես նաև մասնակից 6-րդ «ա» և 6-րդ «ե» դասարանները պարգևատրվել են պատվոգրերով։