Երկար ճանապարհի առաջին քայլերը

«Գազպրոմ Արմենիա» ՓԲԸ «Ուսումնա-սպորտային համալիր» հիմնարկի տարրական դպրոցը առաջարկում է կրթական ծրագիր, որը համադրում է դասավանդման ավանդական և ժամանակակից մեթոդները։ Այն ստեղծում է միջավայր, որտեղ յուրաքանչյուր սովորող կարող է բացահայտել իր կարողությունները և ձևավորել կայուն արժեքային համակարգ։

✔️Ուսուցման առանձնահատկություններ

Տարրական դպրոցում ներդրված է ֆենոմենակենտրոն ուսուցում, որն ուղղված է սովորողների քննադատական մտածողության, ինքնուրույնության, թիմային աշխատանքի և ստեղծագործականության զարգացմանը։

Օտար լեզուների ուսուցումը կազմակերպվում է առաջին դասարանից․ 2-րդ դասարանից սկսած սովորողները ռուսերենի և անգլերենի դասաժամերին բաժանվում են խմբերի՝ ըստ իրենց գիտելիքների մակարդակի։ Այս մոտեցումը ապահովում է անհատականացված և արդյունավետ ուսուցում։

Բացի դասացուցակով նախատեսված պարապմունքներից, կազմակերպվում է նաև դասապատրաստում, որն իրականացնում են դասվարը, դասվարի օգնականը և առարկայական ուսուցիչները։

Հաշվի առնելով երեխայի տարիքային զարգացման առանձնահատկությունները՝ ծնողի համաձայնությամբ երեխան հնարավորություն ունի ստանալ հոգեբանի և լոգոպեդի աջակցություն։

✔️Կրթություն

Պետական պարտադիր բաղադրիչով նախատեսված առարկաների դասավանդմանը զուգընթաց ՈՒՍՀ այլընտրանքային ծրագրով նախատեսվում են երեք հիմնական ուղղություններով զարգանալու հնարավորություններ՝

• մտավոր ուղղվածություն՝  տրամաբանական թվաբանություն, համակարգչային գիտություն, լեգո-ռոբոտիկա, գիտություն («Փոքրիկ գյուտարար»),
• ֆիզիկական ուղղվածություն՝ լող, գեղասահք, ֆուտբոլ, մինի բասկետբոլ, ձյուդո,
• ստեղծագործական ուղղվածություն՝ «Արտտեխնոլոգիա» առարկա, որը ներառում է բիբլիոթերապիա, երաժշտաթերապիա, թատերաթերապիա, հեքիաթաթերապիա, իզոթերապիա։

4-րդ դասարանից սկսած սովորողներն ընդգրկվում են շախմատի հավաքական և մաթեմատիկայի օլիմպիական խմբակներում։

✔️Ընդունելություն

«Գազպրոմ Արմենիա» ՓԲԸ «Ուսումնա-սպորտային համալիր» հիմնարկում ընունելությունն իրականացվում է ըստ Կարգի։

Տարրական դպրոցի 1-ին դասարանի ընդունելությունը կազմակերպվում է մրցութային հիմունքներով, և ընդունելության համար կարող են դիմել մինչև տվյալ տարվա դեկտեմբերի 31-ը ներառյալ 6 տարին լրացած երեխաները։

Ընդունելությունը կազմակերպվում է եռափուլ գործընթացով՝

1-ին փուլ՝ բաց դռների օր և ընդունելության գրանցում․

• էլեկտրոնային գրանցում (ընդունելության մեկնարկի մասին հայտարարությունը տեղադրվում է ՈՒՍՀ կայքում, ինչպես նաև սոցիալական ցանցերի էջերում),
• բաց դռների օրվա մասնակցություն, ծնողների ծանոթացում դպրոցի կրթական ծրագրին,
• ընդունելության գրանցում։

2-րդ փուլ՝ դիմորդի հետ փուլային հարցազրույց-հանդիպումներ․

• իմացական ոլորտի, ուսումնական հմտությունների, հուզակամային և վարքային ոլորտների դիտարկում։ Ձևաչափը՝ անհատական հանդիպում,
• շփման, հաղորդակցման և սոցիալական, ինչպես նաև ինքնակարգավորման և ինքնասպասարկման հմտությունների դիտարկում։ Ձևաչափը՝ խմբային խաղ-հանդիպում։ 

3-րդ փուլ՝  դիտարկման արդյունքների ամփոփում․

• ընդունելության արդյունքների ամփոփում և Դպրոցի որոշման մասին ծնողների տեղեկացում՝ էլեկտրոնային փոստի միջոցով,
• ընդունելության փուլերը հաջողությամբ հաղթահարած դիմորդների ծնողների հետ պայմանագրերի կնքում՝ ըստ հաստատված կարգի և ժամկետների։

Տարրական դպրոցի մյուս՝ 2-րդ, 3-րդ, 4-րդ դասարաններում ընդունելությունը կազմակերպվում է գիտելիքի ստուգման հիման վրա և տեղերի առկայության դեպքում։

📌Մանրամասների համար կարող եք զանգել 012 620 626 հեռախոսահամարով։